am 1. mai fahret mir mit em zug uf lignano und übernachetet denn s'ersti mal uf em segelschiff. am nächste tag laufet mir denn us und seglet dä küste entlang richtig zadar. ich han eui da mal es paar föteli vom schiff und zwei karte zur orientierig.

1.5. mir (ivi, martina, reto, lisa und römi) sind mit em zug guet in lignano acho und händ nach emene feini znacht s'ersti mal uf em schiff vo eusem skipper jürg pfuuset.

2.5. nach em ikauf und tanke simmer planmässig usglaufe. aber scho uf em weg us em hafe häts en alarm gä, wil öpis mit dä wasserpumpi nüme guet gsi isch. mir händ müese umkehre und d'jürg und sin handlanger römi händ denn d'fehler gsuecht. mit hilf vomene mechaniker isches denn am abig gschafft gsi.

3.5. mir sind drum denn erst am samstig morge losgfahre. bi schönstem wetter und fast kei wind hämmer unter motor dä golf vo triest überquert und sind üs in novigrad für kroatie go amelde. denn simmer witer uf porec, wo mir s'ersti mal im hafe übernachtet händ.

4.5. mir sind über rovinj uf pula tuckerlet. eimal häts kurz echli wind gä und mir händ s'erst mal chöne s'segel setze.

5.5. a dem tag isch es denn so richtig zur sach gange. bi viel wind und welle hämmer verbi am lüchtturm vom porer dä kvarner überquert und sind denn uf dä insle mali losinj acho. s'schiff isch paar mal zimli schräg im wasser glege und es isch nüme allne so wohl gsi.

6.5. am morge hät dä reto sini fischerkarriere gstartet. leider wartet mir bis hüt na uf sin erst fang ;-) mir sind denn usgloffe und zerst bi dä insle ilovik imene kanal ane boje go alegge und händ echli badet und uf em schiff z'mittag gesse. wil denn wieder echli wind ufcho isch, simmer denn witer uf d'insle silba gseglet. s'manöver im hafe isch denn leider echli id hose und d'mooring (seil vom hafe) hät sich i üsere schrube verwicklet. dank em tauchisatz vom ivi hämmer das problem denn aber chöne löse. merci ivi!! defür simmer denn mit emene traumhafte sunneuntergang und emene feine znacht entschädiget worde.

7.5. en traum tag mit es bizli wind. mir händ scho a dä täg vorher es paar mal delfin gseh, aber das mal hät üs en delfin während mehrere minute begleitet und isch grad vor em bug hergschumme und immer wieder uftaucht. denn hämmer d'insle molat erreicht, wommer ä traumhafti bucht gfunde händ. mir sind s'einzige schiff det gsi. mit eusem dingi (biboot) simmer uf d'insle gfahre und per autostop in hautort trampet. diä insle hät total 222 iwohner!!! am abig hät üs da jürg es feins rindsragout mit riis kochet.

8.5. am morge isch absolut windstill gsi und s'wasser i dä bucht spielgelblank. wo denn dä ersti fischer zrugg cho isch, hät dä jürg dä grad zu üs gwunke und mir händ im grad frische seetüfel für dä znacht abkauft. nachem zmorge simmer via bozawa und lucina uf veli iz tuckeret und gseglet. das sind alles chlini insle vor zadar. zum znacht hät denn dä jürg mit em ikauf vom morge es megafeins fischcurry kochet. das isch eifach dä hammer gsi. danke jürg!

9.5. geburri vo dä martina und dä lisa! nachemene gmüetliche zmorge simmer richtig zadar tuckeret. zum glück isch denn na wind ufcho und mir händ na chöne segle. am abig simmer denn id stadt go esse.

10.5. hüt mues d'lisa scho wieder hei ga ;-( dä reto bringt sie jetzt uf dä flughafe und mir gnüsset echli d'stadt und dä schöni tag. im fotialbum häts jetzt au die erste föteli...

11.5. vo zadar us hämmer e schöni bucht bi de insle kakan agstüret. am abig hämmer dä neui grill vom jürg igweiht. dä reto hät en feine griechische salat gmacht, de jürg en feine risotto und ich han grilliert. und wieder mal en traumhafte sunneuntergang...

12.5. nach em zmorge i de bucht simmer uf sibenik gseglet und denn dur en wunderschöne fjord bis uf skradin. dä fjord isch so verwinklet gsi, dass mir zum teil gmeint händ, es gaht gar nüme witer. im malerische hafe vo skradin hämmer denn es deftigs spanferkel verspiese.

13.5. am morge sind de ivi und de reto mit em bike und d'martina und ich mit em boot in nationalpark vo krka gfahre. dä park isch ä richtigi idylle mit unzählige wasserfäll, flüss, bächli und seeli. über holzsteg simmer fast 2 stund im park gsi. am schluss bini denn als einzige na chli go bade und dusche im unterste becki. nach em mittag simmer denn wieder dur dä fjord zrugg is offene meer und dä küste entlang uf primosten und denn ine ruhigi bucht bi kremik. wil eusi beide fischer wieder nüt gfange händ, hät eus denn d'martina ganz feini spaghetti gmacht.

14.5. hüt hät d'martina nach langem zögere und viel widerstand zum erste mal im lebe in seeigel id hand gna!!! nach em morgebad i de bucht simmer uf d'insle veli drvenik gseglet und händ det im hafe agleit. zum znacht hämmer en wunderbare mit oliveholz grillierte branzino gesse. dezue hät en kroatische skipper mit sinere gitarre und stimm na für es guets ambiente gsorget.

15.5. am morge hämmer direkt ä bucht bi dä insle solta agstüret. det hämmer dä ganz tag plegeret und d'sunne gnosse. gege dä abig simmer in hafe vo milna uf de insle brac igloffe und händ endli wiedermal chöne dusche.

16.5. nach em zmorge simmer ohni halt uf trogir tuckeret, wo mir dä namittag i dä wunderschöne altstadt gnosse händ. am abig hämmer zum abschied vo de martina und em reto na fein gesse und trunke.

17.5. am morge am 6i hät de ivi diä 2 heimkehrer mit em schluchboot vo eusem ankerplatz as land gfahre, wo ihres flughafetaxi gwartet hät. nachem zmorge isch dä jürg go shoppe und hät soebe sini erste crocs kauft ;-) mir blibet hüt na in trogir und stechet denn morn wieder in see...

na es paar allgemeini bemerkige vo mir: mittlerwile hämmer so zimli alli manöver im griff und das sind würkli nöd wenig!! diä 2 fischer händ na nüt gfange und eine isch jetzt scho wieder uf em heiflug. dä ander hät sich jetzt neus material kauft in trogir und ich bi genauso gspannt wie ihr, wiä diä story witergaht....

18.5. mir händ probiert richtig süde z'segle. leider isch dä wind genau us eusere richtig cho und das na zimli stark. mit bis zu 35 knote und recht höche welle. nach 4 stund kampf im sturm simmer denn wieder zrugg uf trogir, wil das s'einzig sinnvolle gsi isch. mir händ denn gseit, dass mir jetzt wüsset, was en sturm isch und eus das nüme wänd atue....

19.5. dä wetterbricht für dä tag isch wieder besser gsi und mir händ eus uf dä weg nach hvar gmacht. s'meer isch wieder ruhiger gsi und mir sind guet vorwärts cho. wo mir denn aber zwüschet dä insle brac und solta use cho sind und hvar scho vor auge gha händ, hät dä neptun namal en überraschig für eus gha. windstärki 9 mit bis zu 45 knote und na viel höcheri welle als am tag vorher. ich han probiert s'schiff uf kurs z'halte und dä ivi und dä jürg händ d'segel müese inenä, während mir vo dä welle duregschüttlet und nassgsprützt worde sind. mir händ üs denn unter motor dur diä welle kämpft und euses ziel scho fast erreicht gha, wo denn dä motor dä geist ufgä hät. leider isch dä wind immerno genau us dere richtig cho, wo mir händ here welle. ich bi denn öpe 2 stund vor dä insle hvar krüzt ohni würkli vorwärts z'cho, währenddem dä jürg mit em ivi probiert hät, dä motor wieder in gang z'bringe. leider ohni erfolg. mir händ eus also scho vorgestellt, wiä mir ohni motor diä ganz nacht irgendwo uf em meer em kämpfe sind. zum glück hät denn nachem 6i dä wind echli nalah und au es bizli kehrt, so dass mir na id hafeifahrt vo dä insle sv. klement vor hvar händ chöne segle und eus denn es paar pole na in hafe gschleppt händ. mir händ während praktisch 10 stund nüt gesse und trunke und sind nume am rotiere gsi. ich chan eui säge, dass ich no niä so froh gsi bin, wieder imene hafe z'si. nebet em motor sind dem sturm au na dä sitz vom stürma und es paar anderi teili zum opfer gfalle. leider gits vo dem unglaubliche tag kei föteli, wil das schlicht unmöglich gsi wär...

20.5. nachdem dä jürg am morge dä motor nöd zum laufe bracht hät, hämmer en mechaniker ufbote, wo dä hoffentli wieder zum laufe bringt. dä ivi und ich sind jetzt i dä stadt hvar, wos eus mega guet gfallt. i 30 minute händ mir en massagetermin, was mir eus nach dene strapaze redlich verdient händ :-))

21.5. dä grund für eusi "todesängst" uf em meer isch also gfunde. es chlises silikonteili isch i dä leitig vom dieseltank zum motor hange blibe gsi. jetzt isch aber wieder alles gflickt und mir chönd morn wieder in see steche. hüt simmer nomal dä ganzi tag in hvar gsi und gönd jetzt denn na inere bar oder emene resti dä championsleaguefinal go luege. 

22.5. mir händ na en letzte espresso i dä schöne bucht vo sv. klement gna und händ üs denn wieder ufs meer gwagt. mir händ kurs uf d'nordküste vo hvar gna und sind bi schönem dä nordküste entlanggselglet. am namittag hämmer denn ä schöni bucht vor stari grad gfunde und det gankeret. jetzt hät dä ivi endli zit gha sini fischerruete ufzrüste. er isch denn as land go fische, dä jürg isch go wandere und ich han uf em schiff gsünnelet und glese.

23.5. bi traumwetter hämmer bis am namittag diä bucht na gnosse und dä ivi hät namal in mast ufe müese öpis go repariere. denn simmer in hafe vo stari grad tuckeret, wo mir denn eusi vorrät für diä letzt wuche ufgfüllt händ.

24.5. a dä nordküste entlang zrugg simmer uf d'insle vis gseglet. det hämmer denn zerst müese eusi dieseltänk uffülle und händ denn ä megaschöni bucht mit emene chline sandstrand gfunde. das isch also würkli selte in kroatiä!! mir sind denn sofort mit em dingi an land gfahre und händ eus in sand gleit. am abig hämmer denn wiedermal grilliert uf em schiff. 

25.5. mir sind dä ganz tag i dä bucht blibe und händ dä summer gnosse. nachem znacht i dä beiz vo dere bucht isch euse nachtturn agseit gsi. wils praktisch windstill gsi isch hämmer diä ganz strecki unter motor gmacht. zerst händ dä ivi und ich wach gschobe.

26.5. am halbi 2i isch denn dä jürg ufgstande und ich bi go ligge bis am 4i. dä ivi isch denn erst kurz vorem 4i is nest. kurz vor em 5i am morge hämmer denn eusi bucht bi kakan erreicht und gankeret. denn händ dä jürg und ich au wieder is bett chöne. mir sind denn dä ganz tag i dä bucht blibe und händ eus vo dä strenge nacht erholt.

27.5. bevor mir üs uf dä weg id kornaten gmacht händ, isch na früehligsputz agseit gsi. dä ivi und ich händ mit em dingi dä rumpf usse vom schiff vom salz befreit! bi dä nächste welle häts denn leider halt scho wieder echli dra gha ;-) mir sind denn id kornate ine und händ i dä bucht bi lavsa anere boje festgmacht. im beizli hämmer am abig en feine fisch vom grill übercho.

28.5. mir sind witer deruf i dä kornate und denn id telascica (insle dugjotok) ine. i dä bucht mir sind dä ivi und ich denn an land gange go dä salzsee und diä steile klippe go aluege. i dä zwüschezit hät eus dä jürg en feine zmittag gmacht. wils en guete wind gha hät, simmer denn nachher grad witer und na bis uf brbinj gseglet.

29.5. hüt isch eusi letzt etappe agseit gsi. am morge isch s'meer so glatt gsi, dass mir scho händ welle es wakeboardcamp eröffne in kroatiä ;-) nachemene letzte bad im meer isch denn plötzlich en bissige wind ufcho. wil dä aber genau us eusere richtig cho isch, hämmer denn d'segel nüme gsetzt und sind uf zadar tuckeret. im hafe hämmer na s'deck gschrubbet und alles abgsprützt. denn simmer echli an strand glege.

30.5. am morge simmer echli id stadt go käfele und shope. nachem zmittag simmer denn wieder an strand, wils so heiss gsi isch. am abig simmer denn s'letzt mal zäme go znacht esse.

31.5. uf diä 5i am morge hämmer es taxi für an flughafe bstellt. mir händ echli bibberet, öb denn dä au würkli so früe am morge chunt. er isch denn aber pünktlich det gsi. mir sind denn guet ä stund vor eusem flug uf zagreb am flughafe gsi und händ gwartet bis sich endli öpis tuet. es isch aber kein check-in-schalter ufgange! defür isch denn bi eusem flug plötzlich "cancelled" ufglüchtet. natürli isch denn au euse witerflug vo zagreb uf züri flöte gange. zerst händs eus welle mit emene bus uf zagreb fahre, wo mir denn am abig na en flug uf züri gha hettet. mir händ denn aber im internet na en flug am mittag vo zadar uf friedrichshafe chöne bueche und sind denn en halbe tag i dem tote flughafe umeglege. d'martina hät üs denn zum glück in friedrichshafe abgholt. merci vielmal!! so simmer denn doch na guet heicho. 

na es paar schlussbemerkige vo mir: trotz viel usdur und geduld hät dä fischer ivi leider nüt gfange ;-( i dä letzte 2 wuche hämmer abgseh vom sturm zimli alles im griff gha. ich han das schiffli gstüret und dä ivi hät d'mooring oder boje gfischet und d'leine agmacht. dä jürg hät meistens nume na müese applaudiere ;-)) okee, bim segel setze hämmer ihn scho na brucht, aber nume wil d'weiche kaputt gsi isch ;-)) mir händ en wunderschöne monet gha und nämet unglaublich viel idrück mithei. mir händ rund 500 seemeile mit em schiff gmacht. es hät niä gregnet und isch meistens schön wetter gsi. diä erste 2 wuche na chli chüeler aber nachem südsturm isch denn dä summer cho und diä 2 matrose ivi und jürg sind au na chli brun worde. mir händ wahnsinnig guet gesse (meistens fisch aber au s'fleisch isch fein gsi) und viel bier und mittelmässige wii trunke. trotz em sturm und welle isch niämer seekrank worde. mir sind denand uf dem chline ruum natürli au ab und zu uf dä wecker gange, aber im grosse und ganze hämmers immer guet gha unterenand. zum schluss nume na öppis: merci vielmal jürg, dass mir all das händ chöne erlebe!