diä erste 6 wuche vo mim unglaubliche summer bin ich uf guadeloupe. zerst 4 wuche i dä schuel am französisch lerne und dänn na 2 wuche feriä mit dä nici.

da hani eui es paar ersti infos vo guadeloupe:

insel wetter schule

17.3. ich bin planmässig in guadeloupe acho und vom taxi abgolt worde. nume mini family hät na nüt gwüsst vo mir ;-( es hät denn aber doch na alles klappet und ich ha na es zimmer übercho. am 7i gits zmorge und am 8i fangt d'schuel a. jetzt hani bereits min erste schuelmorge verbi und warte uf min privatunterricht am nami. nachher isch dänn strand agseit ;-))

20.3. han mi scho an härte schuelalltag gwöhnt. vom 8i bis am halbi 3i isch na zimli streng!! nachher gahts immer direkt an strand. leider gaht d'sunne da aber scho am viertel ab 6i abe und es wird zimli schnell dunkel. drum freumi jetzt scho ufs weekend, woni dänn 3 täg ohni schuel dä strand chan gnüsse. viellicht gönd mir dänn au na d'insle echli go uskundschafte. im fotoalbum gfindet ihr diä erste föteli vo guadeloupe.

26.3. zerst mal merci vielmal für eui iträge im gästebuech. über ostere hämmer es auto gmietet und sind basse-terre go erkunde. am samstig hämmer a dä ostküste verschiedeni dörfli und stränd aglueget und sind bis ganz in süde abe gfahre. zum teil sind d'stränd det ganz schwarz wegem lavasand. im zentrum vo basse-terre isch en riesige urwald und en vulkan. am sunntig simmer dänn im urwald um dä see "grand etang" umegloffe und nachher diä grosse wasserfäll (2 sind über 100m höch) go aluege. am mäntig simmer a dä westküste vo basse-terre uf en schnorcheltrip zumene koralleriff binere vorglagerete insle. isch trotz em wellig meer zimli cool gsi und mir händ viel schöni fisch und koralle gseh. zum föteli ufelade hani jetzt grad leider kei zit, wil ich grad wieder id schuel mues, aber diä chömet denn gli....

28.3. ....jetzt sind diä neue föteli druf!

1.4. nachere strenge wuche i dä schuel hämmer am wuchenend wieder es auto gmietet und am samstig ä tour uf grand-terre gmacht. zerst simmer zum östlichste (pointe des chateaux) und dä zum nördlichste punkt (pointe de la grande vigie) vo guadeloupe gfahre. det häts wahnsinnig höchi welle und steili küste. nachher hämmer im weste vo grand-terre bi port-louis en traumhafte strand zum chille gfunde. am sunntig morge simmer ganz früe los und händ en ganztägige kajakusflug gmacht. zerst simmer zunere zwei insle padlet und händ viel vögel, krebs, seeigel, seesterne und anderi meerestier gseh. vor dä insle häts grad es riff mit wunderschöne koralle gha. nach em schnorchle häts dänn en apero und en zmittag gä. nachher simmer zrugg as ufer padlet und händ üs dur d'mangrove durekämpfe müese. das isch alles imene riesige naturschutzgebiet und unglaublich idillisch gsi. zum hafe zrugg hämmer dänn wieder ufs meer mües und händ zimli gegewind und welle gha. insgesamt simmer über 10 km padelt und denn recht kaputt gsi nachher. d'föteli hani au scho druf tue!

9.4. am letzte samstig simmer uf em vulkan obe gsi. er isch kanpp 1500m höch und für dä ufstieg hämmer öpe 1.5 stunde brucht. leider isch uf em vulkan wege dä höche luftfüechtigkeit und dä strake wind nume 20 täg im jahr würkli schön wetter. mir händ zwar en schöne tag verwütscht, aber leider nöd eine vo dene 20 täg. es hät en dichte nebel gha und unglaublich fest gwindet. nume dank em schwefelgstank hämmer gmerkt, dass mir uf emene vulkan sind. am sunntig bini denn s'erste mal eifach dä ganzi tag am strand gsi und han echli glese und pfuuset. i dä schuel gaht d'zit wie im flug verbi. letzt wuche simmer mit dä lehrerin an märt und sie hät üs alli frücht, gmües und gwürz vo guadeloupe zeiget. natürli hämmer au alles chöne probiere. alles schmöckt unglaublich intensiv und fein. am schluss simmer denn na bim nationalgetränk hange blibe. dä rum gits da i allne sorte und diä hämmer denn au müese degustiere ;-))

14.4. jetzt hani d'schuel abschlosse und chami voll uf d'nici und dä strand konzertriere ;-) sie sitzt scho im flüger und ich gang sie nachher go abhole in point-a-pitre. am mittwuch nach dä schuel hämmer na en surflehrer buechet und üs id welle gwagt. es isch aber gar nöd so eifach wiäs immer usgseht und isch au zimli streng. am dunstig während mine privatlektionen bini mit dä lehrerin an strand und han sie im scrabble gschlage! das seit ja wohl meh als jede test über mini französischkenntnis ;-) am sunntig simmer mit emene katamaran uf petit-terre. es isch trotz em sturm, dä höche welle und em rege es riese erlebnis gsi. uf dä insle, wo es naturschutzgebiet isch, hämmer viel leguane gseh. bi schnorchle am schöne riff hani denn en riesige adlerroche, barracudas, schildchrotte und vieli anderi fischli gseh. uf em schiff hämmer au mega fein gesse und natürli au echli rum trunke ;-) diä neuste föteli sind au druf!

29.4. nach knapp 2 wuchä strandferiä mit dä nici bini am sunntig wieder i dä schwiiz glandet. diä erst und strengst etappe vo mim summer isch somit verbi ;-)